Руското Министерство за надворешни работи соопшти дека примило делегација од Хамас и дека за време на средбата повикало на ослободување на заложниците кои ги држела групата во Појасот Газа, меѓу кои и тројца руски државјани, пишува Ројтерс.
Министерството во соопштението наведува дека заменик министерот за надворешни работи Михаил Богданов го примил членот на Политбирото на Хамас, Абу Марзук.
„Во текот на разговорот фокусот беше ставен на тековната конфронтација во палестинско-израелската конфликтна зона, поради која хуманитарната криза во Појасот Газа достигна катастрофални размери“, се вели во соопштението на МНР.
„Руската страна ја нагласи потребата за брзо ослободување на цивилите заробени за време на нападот на 7 октомври 2023 година и држени од палестински фракции, вклучително и тројца руски државјани – А. Козлов, А. Лобанов и А. Труфанов“, се вели во соопштението.
