Претставникот на руската Државна дума, Андреј Гуруљов, неодамна се закани дека ќе ја нападне Алјаска со серија различни ракетни напади.Водителката Олга Скабеева и други руски коментатори зборуваа за напади врз различни цели во САД.
„Тексас не треба да биде нападнат. Имаме стратешка нуклеарна сила. Да ве потсетам, Алјаска е таму од другата страна на теснецот“, рече Гуруљов според видеото објавено од Антон Герашченко, советник на украинскиот министер за внатрешни работи.
„Имаме оперативни ракети Искандер, балистички, крстаречки ракети кои можат да ја избришат Алјаска до земја. За тоа не треба многу, доволни ќе бидат неколку бригади“, додаде тој.
Кога друг коментатор се приклучи и праша зошто Русија ќе ја нападне Алјаска, Скабеева рече дека тоа ќе го направат „за да ги исплашат“.
„Њузвик“ потсетува дека ова не е првпат Гуруљов да се заканува на една земја за време на руската инвазија. Во март тој рече дека Русија треба „да ја избрише Велика Британија од лицето на земјата“.
