Поранешниот руски претседател Дмитриј Медведев предупреди дека конфликтот на Москва со Западот ќе трае со децении, додека конфликтот со Украина може да стане траен.
Медведев, кој некогаш на Запад се сметаше за либерален модернизатор, е еден од најистакнатите руски јастреби откако Москва ја започна својата инвазија на Украина минатата година.
Тој сега е заменик-шеф на Советот за безбедност на Русија, а неговите ставови одразуваат дел од размислувањата на највисоко ниво во Кремљ, според руските власти. Во написот за владиниот весник „Росијскаја газета“, тој напиша дека тензиите меѓу Русија и Западот биле „многу полоши“ отколку за време на кубанската ракетна криза во 1962 година, кога светот беше на работ на нуклеарна војна.
– Нуклеарната војна тогаш беше сосема веројатна, но мала беше веројатноста да има победник – напиша Медведев, кој постојано повторува дека поддршката на Западот за Украина ги зголемува шансите за нуклеарен конфликт.
Тој посочи дека има големи разлики меѓу Западот и Русија во однос на Украина, во поглед на насоката во која треба да се движи човештвото и во поглед на начинот на кој е структуриран светскиот поредок.
– Постои едно нешто што политичарите од сите слоеви не сакаат да го признаат: таквата апокалипса не само што е можна, туку е и многу веројатна – напиша Медведев.
Западните аналитичари го гледаат „нуклеарното ѕвецкање“ на Медведев како тактика со цел да го заплаши Западот за да ја намали воената помош за Украина, за Киев да може да почне мировни преговори со Москва.
Медведев истакнува дека Москва останува посветена на запирање на зачленувањето на Украина во НАТО.
– Нашата цел е едноставна – да ја елиминираме заканата од членството на Украина во НАТО. Ќе го постигнеме тоа – на овој или оној начин – рече тој.
Со оглед на правилото на НАТО да не се примаат земји вклучени во територијални конфликти, Медведев тврди дека конфликтот со Украина може да стане „траен“ со оглед на неговата егзистенцијална важност за Москва.
Единствениот начин за деескалација на тензиите меѓу Русија и Западот е да се започнат тешки преговори, смета Медведев.
– Конфликтот ќе биде многу долг и предоцна е да се скротат непослушните. Конфликтот ќе трае со децении – напиша Медведев.
