Русија нема право на вето на одлуката за влез на Украина во НАТО алијансата, изјави генералниот секретар на НАТО Јенс Столтенберг на денешниот самит на деветте земји од источното крило на алијансата во Братислава. Истовремено, тој рече дека работи на што поскоро пристапување на Шведска, чие членство во НАТО се уште е блокирано од Турција и Унгарија.
„Сите членки на НАТО се согласија дека вратата на Украина останува отворена, дека таа ќе стане членка на алијансата и дека Русија нема право на вето“, изјави генералниот секретар на НАТО, Јенс Столтенберг. Тој зборуваше и за плановите за претстојниот самит на алијансата, кој ќе се одржи во литванската престолнина Вилнус во средината на јули.
„Одлуките што ќе ги донесеме на самитот во јули ќе бидат многу важни. Ќе ја зајакнеме нашата поддршка за Украина со повеќегодишен пакет помош за да и помогнеме да премине од советската ера кон стандардите на НАТО“, рече генералниот секретар на НАТО, пренесува италијанската новинска агенција Анса.
Столтенберг денеска повтори и дека работи напорно за да се приклучи Шведска. На оваа тема, меѓу другото, беше и неговата неодамнешна посета на претседателот Реџеп Таип Ердоган во Турција, која освен Унгарија е единствената членка на НАТО која ги нема ратификувано шведските пристапни протоколи.
„Понатаму, на самитот во јули, со посветеност на нов одбранбен план, уште повеќе ќе ги интензивираме нашите акции. Треба да се договориме и за посилна определба за зголемување на инвестициите во одбраната на земјите-членки со најмалку два отсто од БДП“, рече Столтенберг на денешниот самит на лидерите на деветте земји од источното крило на НАТО.
Група од девет земји беше формирана во летото 2015 година како одговор на руската анексија на Крим, составена од Словачка, Естонија, Латвија, Литванија, Полска, Чешка, Унгарија, Романија и Бугарија. На денешниот самит во Братислава се очекува лидерите да усвојат, меѓу другото, декларација за солидарност со Украина.
