Русија и Кина ставија вето на американската резолуција за прекин на огнот во Газа
Советот за безбедност на ОН не усвои американска резолуција со која се повикува на итен прекин на огнот во Газа како дел од договорот за заложници. Вето ставија Русија и Кина.
Василиј Небензија, рускиот амбасадор во ОН, рече дека резолуцијата е премногу политизирана и „содржи ефективно зелено светло за Израел да започне воена операција во Рафах“.
Тој рече дека САД сега се обидуваат да „продадат производ“ на Советот користејќи го зборот „императив“ во својата резолуција.
„Ова не е доволно“ и Советот мора „да побара прекин на огнот“, изјави тој.
Тој рече дека во текстот нема повик за прекин на огнот, обвинувајќи го американското раководство дека „намерно ја доведува во заблуда меѓународната заедница“, а нацртот е само „игра“ за американските гласачи и „лажен повик за прекин на огнот“.
Американскиот претставник рече дека Русија „ја ставила политиката над напредокот“ и дека Русија и Кина не прават ништо значајно за промовирање на мирот. Линда Томас-Гринфилд рече дека неуспехот на резолуцијата е „навистина срамота и под достоинството на Советот за безбедност на ОН“.
Единаесет земји од 15-члениот Совет за безбедност ја поддржаа резолуцијата.
Против гласаа три земји, постојаните членки Русија и Кина и ротирачката членка Алжир.
Една земја, Гвајана, беше воздржана.
