Русија во понеделникот ја осуди одлуката на Данска и Холандија да донираат борбени авиони Ф-16 на Украина, предупредувајќи дека тоа ќе доведе до ескалација на конфликтот.Данска и Холандија во неделата објавија дека ќе и обезбедат авиони Ф-16 на Украина. Првите шест авиони ќе бидат испорачани околу Нова година.
„Фактот што Данска сега одлучи да донира 19 авиони Ф-16 на Украина доведува до ескалација на конфликтот“, изјави рускиот амбасадор Владимир Барбин, а пренесува агенцијата Рицау.
„Криејќи се зад премисата дека Украина самата мора да ги одреди условите за мир, Данска сака со своите постапки и зборови да постигне дека Украина нема друг избор освен да го продолжи воениот конфликт со Русија“, рече тој.
Данскиот министер за одбрана Јакоб Елеман-Јенсен изјави дека Украина ќе може да ги користи донираните авиони Ф-16 само на своја територија.
„Ние донираме оружје под услов да се користи за протерување на непријателот од територијата на Украина. И не повеќе од тоа“, рече Елеман-Јенсен во понеделникот.
„Тоа се условите, без разлика дали се работи за тенкови, борбени авиони или нешто друго“, додаде тој.
Данска ќе и подари на Украина 19 авиони. Холандија има на располагање 42 авиони Ф-16, но се уште не одлучила дали ќе ги донира сите.
Украинскиот претседател Володимир Зеленски изјави во неделата дека авионите ќе ги зајакнат воздушните сили на Украина и ќе помогнат во контраофанзивата против руските сили.
Albanian
English
Macedonian
Turkish
