Министерството за надворешни работи на Молдавија денеска прогласи службеник на руската амбасада во Кишињев за персона нон грата, набргу откако властите во Кишињев уапсија двајца молдавски функционери откако безбедносните сили упаднаа во просториите на парламентот во врска со истрага за шпионирање.
Рускиот амбасадор Олег Васнецов „денес беше поканет во Министерството за надворешни работи и му беше врачена нота со која вработен во амбасадата е прогласена за персона нон грата“, се вели во соопштението на Министерството.
Министерството додаде дека потегот е поттикнат од „информации и докази“ добиени од молдавските власти, кои докажуваат дека рускиот дипломат извршувал „активности некомпатибилни со дипломатскиот статус“ на територијата на Молдавија, објави молдавскиот сервис на Радио Слободна Европа. .
Одлуката за протерување на рускиот дипломат, кој не е именуван, дојде набргу откако агентите на молдавската безбедносна разузнавачка служба (СИС) и Обвинителството за борба против организираниот криминал и специјалните случаи (PCCCOCS) ја претресоа зградата на молдавскиот парламент и го приведоа вработен во собранието, како и граничен полицаец осомничен за велепредавство и завера.
Двајцата, кои според молдавскиот закон може да бидат притворени 72 часа, наводно собрале и дале на службеник на руската амбасада во Кишињев информации кои им штетат на интересите на Молдавија.
Извор на кој се повикува Ројтерс изјави дека заменикот воено аташе во руската амбасада во Кишињев ќе биде протеран. Има 48 часа да ја напушти Молдавија.
„Најважно е сега да се осигураме дека овој случај на предавство ќе биде најстрого казнет во согласност со законот“, рече прозападната претседателка на Молдавија Маја Санду во интервју за молдавската телевизија Журнал во средата.
Од почетокот на руската агресија врз Украина во февруари 2022 година, Молдавија цврсто застана на страната на Западот во осудата на инвазијата и прифати десетици илјади украински бегалци.
Минатиот месец, Молдавија ги отвори пристапните преговори со Европската унија, откако доби статус на кандидат заедно со Украина во јуни 2022 година.
