Аргентина најави остра девалвација на својата валута и намалување на субвенциите за енергија и транспорт како дел од шок-мерките за кои новиот претседател Хавиер Миле вели дека се потребни за да се реши економската „вонредна состојба“. Мерките треба да го намалат фискалниот дефицит, кој се верува дека е причина за економските проблеми во земјата, вклучително и зголемената инфлација.
Министерот за економија Луис Капуто во телевизиска порака рече дека аргентинскиот пезос ќе биде девалвиран за 50% на 800 за американски долар.
Како дел од новите мерки, тој рече дека владата ги откажува тендерите за сите проекти за јавни работи и укинува некои владини работни места за да ја намали големината на владата. Ќе се укинат на половина и министерствата со што аргентинската влада ќе има само 9 министерства.
Министерот за економија најави и намалување на субвенциите за енергетиката и транспортот без да наведе детали или да каже колку.
Аргентина трпи годишна инфлација од 143%, нејзината валута пропадна, а четворица од 10 Аргентинци се осиромашени. Нацијата, исто така, има растечки фискален дефицит, трговски дефицит од 43 милијарди долари, плус застрашувачки долг од 45 милијарди долари кон Меѓународниот монетарен фонд, со 10,6 милијарди долари долг кон мултилатералните и приватните кредитори заклучно со април.
