По две години минати во Белата куќа, тогашниот претседател на Соединетите Американски Држави, Доналд Трамп, одобри тајна кампања на ЦИА на кинеските социјални мрежи со цел да создаде јавно мислење против кинеските власти, објави Ројтерс, повикувајќи се на поранешни американски претставници кои имале врски со оваа строго тајна операција.
Тројца поранешни функционери изјавија за Ројтерс дека ЦИА формирала мал тим од оперативци кои се претставувале себеси на социјалните мрежи за да шират негативни наративи за владеењето на Кси Џинпинг, притоа објавувајќи дискредитирачки разузнавачки информации до странските медиуми.
Според Ројтерс, операцијата започнала во 2019 година.
ЦИА ширела наводи дека членовите на владејачката Комунистичка партија кријат незаконски стекнати пари во странство, додека ја нарече Иницијативата „Појас и пат“, која обезбедува финансирање на инфраструктурни проекти ширум светот, корумпирана и расипничка, изјавија извори за Ројтерс.
Американските официјални лица одбија да дадат конкретни детали за овие операции, велејќи дека дискредитирачките приказни се засновани на факти и покрај тоа што тајно биле подметнати и дистрибуирани од разузнавачи.
Во Кина, операцијата имаше за цел да поттикне страв меѓу највисоките лидери во земјата, принудувајќи ја владата да троши ресурси барајќи упади во строго контролираниот Интернет, изјавија двајца поранешни функционери.
„Сакавме да бркаат духови“, рече еден од овие поранешни функционери.
Челзи Робинсон, портпаролка на ЦИА, одби да коментира за постоењето на програмата за влијание, нејзините цели или влијанија.
Портпаролот на кинеското Министерство за надворешни работи изјави дека вестите за иницијативата на ЦИА покажуваат дека американската влада го користи „просторот на јавното мислење и медиумските платформи како оружје за ширење лажни информации и манипулирање со меѓународното јавно мислење“.
Операцијата на ЦИА беше одговор на повеќегодишните агресивни тајни напори на Кина да го зголеми глобалното влијание, велат изворите.
За време на неговото претседателствување, Трамп бараше построг одговор за Кина од неговите претходници, според Ројтерс. Кампањата на ЦИА сигнализираше враќање на методите што ја одбележаа борбата на Вашингтон со поранешниот Советски Сојуз. „Студената војна се врати“, вели Тим Вајнер, автор на книгата за историјата на политичкото војување.
