Американскиот продуцент и издавач на видео игри, Rockstar Games, со седиште во Њујорк, престана да ги продава своите видео игри во Русија, јави дописникот на руската агенција ТАСС.
Агенцијата наведува дека при обидот да се купи било која видео игра од веб-страницата Rockstar Games во Русија, се појавува порака дека игрите не се достапни во „таа земја или регион“. Во исто време, веќе купените видео игри преку Интернет продолжуваат да функционираат нормално.
Игрите на Rockstar се најпознати по многу популарни наслови како Red Dead Redemption и Grand Theft Auto, франшизи попознати по кратенката GTA.
Неколку продуценти и издавачи изјавија претходно дека веднаш ќе ја прекинат продажбата на видео игри, вклучувајќи ги Electronic Arts (EA), CD Project Red и Activision Blizzard.
