Ринго Стар бил принуден да ги откаже своите настапи овој викенд откако се разболел од мистериозна болест.
Легендата на „Битлси“ (82) требало да настапи во казиното „Фор виндс“ во Њу Бафало, Мичиген во саботата вечерта, но шоуто било откажано кога Стар почнал да се бори со својот глас.
Исто така е потврдено дека Стар не бил позитивен на ковид и дека има здравствен проблем што му влијае на гласот.
Стар, исто така, требало да настапи во казиното „Мистик Лејк“ во Прајор Лејк, Минесота во неделата, но и тоа било откажано, а од местото на настанот потврдиле дека пејачот е болен.
Соопштението на веб-страницата на казиното гласело: „Концертот на Ринго Стар и неговиот „Ол Стар бенд“ закажан за 20 часот во недела на 2 октомври 2022 година е одложен. Ринго е болен и се надеваше дека ќе може да настапи, па оттука и доцното известување“.
„Ринго нема ковид-19. Тој и бендот испраќаат мир и љубов до сите фанови кои планираа да излезат и да го видат шоуто. Презакажаниот термин ќе биде објавен во иднина“, заклучиле тие.
Веста доаѓа откако Стар објави фотографија на која тој и тапанарот Грег Бисонет позираат заедно покрај нивниот приватен авион.
„Грег и Ринго одат на нивната следна свирка, благодарам, благодарам, Торонто, ти испраќам мир и љубов“, напишал Стар заедно со различни емотикони.
