Дури 55 мажи беа приведени во Франција помеѓу понеделник и четврток наутро како дел од голема операција за разбивање на педофилска мрежа што дејствувала преку шифрирани пораки на Телеграм, објави Канцеларијата за малолетничка правда по завршувањето на десетмесечна истрага.
Обвинетите, на возраст меѓу 25 и 75 години, меѓу кои свештеник, дедо, медицинска сестра, „добри татковци“, професор по музика и самохрани мажи, разменувале пораки на Телеграм и биле во контакт со „особено опасни“ педофили кои се во затвор од минатото лето, изјави Квентин Беван, раководител на одделот за операции во Канцеларијата за малолетници (OFMIN).
Апсења се извршени во 42 оддели за поседување, дистрибуција и гледање педофилско-порнографски содржини поврзани со деца под 10 години. Во работата се вклучени 42 обвинителства, со оглед на тоа што случајот не е централизиран.
Сеопфатната операција започна минатото лето со апсење на педофилски криминалци кои злоупотребувале деца и ги објавувале своите злосторства на Телеграм.
Инспекторот Беван истакнува дека работната група посветено работела 10 месеци за да открие докажани педофили, а за време на операцијата биле пресретнати илјадници пораки, слики и друга содржина за сексуална злоупотреба на деца.
Тој тврди дека „Телеграм останува привилегирана платформа за педофили“. Беван признава дека има напредок во однос на соработката меѓу истражителите и платформата во ова прашање по апсењето на Павел Дуров, раководителот на Телеграм, минатото лето, но дека Телеграм сè уште „едвај ги исполнува минимумот од своите законски обврски“ во борбата против педофилите.
