Една од најголемите електрани во Украина е уништена во силен руски ракетен напад, јави Скај њуз. Како што пренесува украински Интерфакс, повикувајќи се на висок функционер во електроиндустријата, целосно е уништена термоцентралата Трпилска.
Електраната се наоѓа недалеку од Киев, главниот град на Украина, и произведува околу 57% од енергијата потребна за снабдување на регионот Киев со електрична енергија.
Рускиот ракетен напад беше извршен рано утринава со ракети и беспилотни летала, а цел на руските сили беше украинската енергетска инфраструктура.
Од „Центренерго“, компанијата која управува со термоцентралата, изјавија дека централата е „целосно онеспособена“, додавајќи дека нема смртни случаи меѓу работниците кои биле на смена за време на нападот.
-Размерите на уништувањето се застрашувачки – рече Андреј Гота, претседател на Надзорниот одбор.
