Рускиот претседател Владимир Путин потпиша указ и oд 1 октомври ќе бидат регрутирани уште 130.000 луѓе.
„Од 1 октомври до 31 декември 2023 година, граѓаните на Руската Федерација на возраст меѓу 18 и 27 години кои не се во резерва и се предмет на регрутирање воена служба во согласност со федералниот закон, ќе бидат регрутирани во воена служба“, се вели во декретот.
Високиот руски воен функционер Владимир Цимљански објасни дека сите воени регрути ќе бидат испратени во формации и воени единици на територијата на Русија, но дека нема да одат во припоените региони – регионите ДНР, ЛНР, Херсон и Запорожје. Покрај тоа, тие нема да бидат вклучени во специјалната операција.
„Сакаме да нагласиме дека Генералштабот нема планови за дополнителни мерки за мобилизација“, се наведува во соопштението на Цимљански.
Руското воено раководство не планира да спроведе мобилизација бидејќи неговите сегашни потреби ги исполнуваат членовите на воената служба од кариера, вклучително и оние кои доброволно се пријавиле да се борат против Украина, изјави висок руски функционер.
Ваквите најави во петокот ги повтори и Цимљански, заменик-началникот на Дирекцијата за мобилизација на Генералштабот.
„Бројот на луѓе кои сакаат да се запишат во руска воена служба со договор, како и на доброволци кои решиле да учествуваат во специјалната воена операција, е доволен за исполнување на нашите задачи“, рече тој.
