„Најтажната принцеза на светот“, како што ја нарекуваат принцезата Шарлин од Монако, конечно се врати дома откако помина четири месеци во установа за ментално здравје.
Од Палатата истакнаа дека Шарлин е подготвена да ги продолжи своите кралски должности со нејзиниот сопруг принцот Алберт и нејзините деца, близнаците Жак и Габриела, пренесува магазинот „Пипл“.
„Нејзиното враќање дома е резултат на големата грижа што ја имаше на клиниката, а сѐ беше одобрено од нејзините психијатри“, додаваат од Палатата.
Престојот на принцезата Шарлин во луксузната швајцарска клиника чинел 43.000 евра неделно, пишува „Дејли мејл“. Се наведува дека ова е една од најдобрите клиники за ментално здравје, но и за борба против зависности.
Клиниката на своите пациенти им нуди индивидуализирани програми, а сите пациенти се сместени во луксузни соби или апартмани. Имаат библиотека, деловни канцеларии, простории за сликање и спа центар, а храната ја подготвуваат најдобрите готвачи.
Принцезата Шарлин беше однесена во установата само 10 дена по враќањето од Јужна Африка, нејзината родна земја, каде што престојуваше со месеци.
– Таа очигледно е исцрпена, физички и емоционално. Преоптоварена и не може да се справи со службените должности, со животот воопшто, па дури и со семејниот живот. Тоа секако е фактор – рече тогаш нејзиниот сопруг, принцот Алберт.
