Пребегнатиот руски пилот Максим Кузминов, кој беше пронајден мртов во Шпанија, најверојатно бил убиен од членови на чеченската мафија регрутирани од руската разузнавачка служба, пишува шпанскиот весник „Ел Мундо“, повикувајќи се на извори блиски до истрагата.
Кузминов предизвика сензација кога во август 2023 година го приземји својот оклопен хеликоптер на воениот аеродром во регионот Харков. Украинското воено разузнавање подоцна откри дека таа го убедила да дезертира и дека Кузминов апелирал до другите пилоти да го сторат истото. По пристигнувањето во Украина, Кузминов го обвини Путин за геноцид поради „бруталното убиство“ на Украинците и Русите во несакана војна. Пилотот беше осуден во Русија како предавник.
Според шпанскиот весник, Кузинов бил убиен со шест куршуми од „макаров“ во гаражата на луксузна зграда во шпанскиот град Вилајохос.
„Ликвидацијата е извршена со советска муниција од членови на чеченската мафија регрутирани од руската надворешна разузнавачка служба“, пишува Ел Мундо.
Според шпанскиот весник, властите уште од првиот ден знаеле дека Кузминов е во Шпанија, иако министерката за одбрана Маргарита Роблес минатата недела изјави дека немаат такви информации.
Шпанските истражители излегоа и со нова теорија за тоа како рускиот пилот го открил својот идентитет пред да биде убиен. Ел Мундо тврди Кузминов се разоткрил кога почнал да прави подготовки да ја донесе мајка си во Шпанија. Шпанските истражители веруваат дека Кузминов направил „фатална грешка“ контактирајќи со најблиските на украински мобилен телефон за кој се верува дека бил прислушуван.
Ирина Кузминова, неговата мајка, наводно ја напуштила Русија под изговор дека заминала на патување во Кореја непосредно пред киднапирањето на Ми-8.
– Наместо тоа, таа се преселила во Украина, каде што се уште живее, криејќи се под заштита на киевските агенти – се наведува во извештајот.
„Ел Мундо“ наведува и дека неговата поранешна девојка Елизавета Пономарјова можеби ги водела убијците до пилотот бидејќи таа е единствената со која се гледал на фотографиите објавени непосредно пред убиството. Според весникот, Кумзинов живеел прилично бурен живот и трошел големи суми пари. По дезертирањето со рускиот воен хеликоптер во Украина наводно му била исплатена награда од 500.000 долари од украинските власти.
