Во Украина, според одлуката на Православната црква на Украина, верниците оваа година првпат ќе можат да го прослават Божик на 25 декември. Православните Украинци традиционално го следат јулијанскиот календар и го слават овој празник на 7 јануари. Отстапувањето од традицијата се случи за време на руската инвазија и распадот на руско-украинските врски, исто така на религиозно поле.
Од револуцијата во 2014 година, Украина се оддалечува од Русија во сите области, а овој процес беше дополнително забрзан со инвазијата на руската армија оваа година.
Со претстојните празници, според анкетата на новинската агенција Интерфакс-Украина, расте поддршката за преминот кон Грегоријанскиот црковен календар. Додека 22 отсто ја поддржаа ваквата промена минатата година, во овогодинешното истражување 44 отсто од испитаниците ја поддржаа промената, покажуваат резултатите на француската новинска агенција АФП.
25 декември е државен празник во Украина од 2017 година. Православната црква на Украина, која во октомври даде зелено светло за оние кои сакаат да го прослават Божиќ пред крајот на годината, во сегашната форма постои веќе четири години.
Во 2018 година, две украински православни цркви, како и дел од членовите на Црквата на Московската патријаршија, се одвоија од Москва и се споија во нова православна црква, чија автокефалност беше признаена од вселенскиот патријарх Вартоломеј Први.
Обединувањето во единствена независна Украинска православна црква, која работи одвоено од Москва, беше отворено поддржано од украинските власти, предводени од тогашниот претседател Петро Порошенко.
Три месеци по почетокот на инвазијата, Украинската православна црква на Московската патријаршија ги прекина врските со Руската православна црква и прогласи „целосна автономија и независност“ од Москва, бидејќи не се согласува со ставот на московскиот патријарх Кирил во врска со војна во Украина.
Во почетокот на декември, украинскиот претседател Володимир Зеленски истакна дека Украина мора да ја брани својата независност и во верската сфера. „Советот за национална безбедност и одбрана ѝ наложи на владата да поднесе до парламентот нацрт-закон за забрана на активностите на верските организации во Украина кои се поврзани со центрите на влијание во Русија“, рече Зеленски во своето обраќање откако украинската разузнавачка служба СБУ спроведе неколку истраги на манастири и цркви на Московската патријаршија.
Во меѓувреме, во главниот град на Украина, во понеделникот беа запалени светилките на 12-метарската вештачка елка, која е украсена со грбот на Украина.
„Не смееме да дозволиме Владимир Путин да ни го украде Божиќ“, објави во ноември градоначалникот на Киев, Виталиј Кличко. Главниот град, како и многу други украински градови, се бори со проблеми со снабдувањето со електрична енергија во последните недели и месеци поради ракетните напади на руската армија врз критичната инфраструктура.
Затоа, во главниот град не треба да има големи настани или концерти. Кличко изрази уверување дека жителите на градот, кој пред војната броеше 2,8 милиони луѓе, се соочуваат со најлошата зима од Втората светска војна.
