Граѓаните во Калифорнија на референдум ја отфрлија мерката која би ја зголемила минималната плата на 18 долари на час до 2026 година, што е највисока во САД. Против мерката гласале 50,8% од луѓето.
Противниците на мерката, вклучително и Стопанската комора на Калифорнија, предупредија дека таквото зголемување на минималната плата ќе ги зголеми трошоците, ќе доведе до повисоки даноци и ќе ги принуди бизнисите да ги намалат работните места.
– Бидејќи економијата и трошоците се на врвот на умот на многу гласачи на овие избори, се чини дека таа порака одекна – рече Џенифер Барера, претседателка и извршна директорка на комората.
Поддржувачите проценуваат дека 2 милиона работници, вклучително и вработените во хотелите и во трговијата, би имале корист од оваа мерка.
– Неуспехот на предлогот е разочарувачки за сите Калифорнијци кои веруваат дека секој што работи треба да заработува доволно за да ги издржува своите семејства – изјави Кети Фин, претседателка на UFCW 770, синдикат во Јужна Калифорнија кој претставува речиси 30.000 работници во различни сектори.
Сегашната минимална плата е 16 долари на час за повеќето работници и 20 долари во секторот за брза храна. Минималната плата во здравствениот сектор треба да достигне 25 долари на час според законот потпишан од демократскиот гувернер Гевин Њусом минатата година.
Хаваите усвоија закон во 2022 година за постепено зголемување на федералната минимална плата на 18 долари на час, но тоа ќе стапи на сила до 2028 година.
Во 2016 година, Калифорнија стана првата држава што донесе минимална плата од 15 долари на час според законот потпишан од тогашниот гувернер Џери Браун.
Околу 40 градови и окрузи веќе имаат минимални плати повисоки од оние утврдени на федерално ниво.
