Воздухопловните сили на НАТО денеска почнуваат со вежби за нуклеарно одвраќање кои ќе се одржат над северозападна Европа. Вежбите ќе траат до 30 октомври, а на нив ќе учествуваат десетици авиони. НАТО нагласува дека тие се рутински и не се поврзани со никакви актуелни светски настани.
Во вежбите наречени „Постојано пладне“, учествуваат 14 земји и до 60 авиони од различни типови, вклучувајќи борбени авиони од четврта и петта генерација, како и извидувачки авиони и авиони танкер за полнење гориво на други авиони. Како и претходните години, и овојпат ќе учествуваат американски бомбардери со долг дострел Б-52.
Обуката ќе се одвива над Белгија, која ќе биде домаќин на вежбите, и над Северното Море и Велика Британија. За време на вежбите нема да се користи оружје.
„Овие вежби помагаат да се осигура дека нуклеарното одвраќање на алијансата останува безбедно, сигурно и ефективно“, рече во петокот портпаролката на НАТО, Оана Лунгеску, без да даде детали за тоа како била спроведена вежбата.
Воените експерти сметаат дека на вежбите, кои редовно се одржуваат во октомври, меѓу другото се практикува како безбедно да се пренесе американското нуклеарно оружје од подземните складишта и да се инсталира на борбени авиони. Оружјето не треба да се носи за време на самите летови, пренесува германската новинска агенција dpa.
Според неофицијални податоци, американското нуклеарно оружје се складира во северна Италија, Белгија, Турција, Холандија и Германија. Таканаречената поделба на НАТО за нуклеарно оружје предвидува дека во итни случаи може да биде фрлено и од авион на земја-партнер.
Новиот стратегиски концепт на НАТО, кој беше усвоен од сојузничките лидери на самитот во Мадрид во јуни, инаку јасно кажува дека основната цел на нуклеарната способност на НАТО е одржување на мирот, спречување на принуда и одвраќање на агресија. Тој исто така посочува дека додека постои нуклеарно оружје, НАТО ќе остане нуклеарен сојуз.
За разлика од претходните вежби, НАТО годинава проактивно ја информираше јавноста за почетокот. Во сојузничките кругови, причината е наведена дека овој пат целта е повеќе од вообичаено да се покаже дека НАТО е добро подготвен дури и за застрашувачко сценарио како што е нуклеарна војна, особено во светлината на руската агресија врз Украина, за време на која рускиот претседател Владимир Путин постојано се закануваше со употреба на нуклеарно оружје.
