Валентин Јумашев, зет на поранешниот руски претседател Борис Елцин, кој му помогна на Владимир Путин да дојде на власт, поднесе оставка како советник во Кремљ, изјавија за Ројтерс две лица блиски до Јумашев, пренесува Н1. Причината засега не се открива, но познато е дека една од ќерките на Јумашев, Марија, уште на 24 февруари објави порака „Не за војната“ на Инстаграм.
Јумашев беше неплатен советник со ограничено влијание врз одлуките на Путин, а неговото заминување претставува отстранување на една од последните врски во администрацијата на Путин со владата на Елцин.
Портпаролот на Кремљ, Дмитриј Песков, сѐ уште не одговорил на барањето на Ројтерс да го коментира заминувањето на Јумашев, ниту пак имаше одговор од самиот Јумашев.
Људмила Телен, првата заменичка извршен директор на Претседателската фондација Борис Елцин, во која Јумашев е член на одборот на комесари, изјави за Ројтерс дека Јумашев поднесе оставка од својата улога како советник на Кремљ во април. На прашањето зошто си заминал, таа рекла дека тоа е негова иницијатива.
Друго лице блиско до Јумашев, кое не сакало да се открие неговиот идентитет, исто така потврдило дека Јумашев поднел оставка како претседателски советник во април.
За време на Елцин, кој беше претседател на Русија од 1991 до 1999 година, Јумашев работеше како советник во Кремљ, а подоцна и како началник на Генералштабот. Оженет е со ќерката на Елцин, Татјана.
Јумашев ја водеше претседателската администрација во 1997 година, кога Путин, поранешен шпион на КГБ, кој една година претходно доби административна работа од среден ранг во Кремљ, беше унапреден во заменик началник на кабинетот на Кремљ.
Ова унапредување му помогна на Путин да биде сметан за наследник на Елцин и да победи на изборите во 2000 година.
Во јануари 2020 година, според веб-страницата на Кремљ, Путин ја посетил ќерката на Елцин, Татјана во нејзината куќа за да ѝ честита роденден. На 24 февруари, повозрасната ќерка на Јумашев и Татјана, Марија, објави фотографија од украинското знаме на својот Инстаграм, со зборовите „Не за војната“, како и емотикон со скршено срце.
