Компаниите во Португалија повеќе нема да можат да ги обврзуваат работниците да доаѓаат на работа во сабота и недела доколку имаат деца помлади од 12 години, пресуди таму Врховниот суд.
Единствен исклучок е ако „вработените се незаменливи“ на своето работно место, објави португалскиот весник Публико, повикувајќи се на содржината на пресудата.
„Правото на усогласување на работата со семејниот живот и правото на заштита на татковството и мајчинството се содржани во Уставот и не можат да се одложат на други професионални права или должности“, се вели во пресудата.
Доколку компаниите бараат вработените кои имаат деца помлади од 12 години да доаѓаат на работа во сабота и недела, ќе треба на суд да докажат дека се незаменливи на работното место и дека со нивното отсуство може да биде загрозена дејноста на компанијата.
Со оглед на тоа дека дел од работниците сега би можеле да имаат бесплатни викенди, постои можност работниците без деца на наведената возраст да бидат оптоварени со дополнителна работа.
Во оваа насока, Врховниот суд соопшти дека во случај на неможност за изнаоѓање решение, неопходно е да се примени „позитивна дискриминација во корист на семејството“.
Врховниот суд во Португалија, земја со население од 10,3 милиони, ја донесе оваа одлука откако една жена од Алмада, јужно од главниот град Лисабон, поднесе жалба на одлуката на мултинационалната компанија за која работеше во 2019 година.
Таа тврдеше дека таа и нејзиниот сопруг работат викенди за компанијата во трговскиот центар и дека никој не може да се грижи за нивните две деца додека се на работа. Работничката напишала писмо до компанијата во кое ја објаснила нејзината ситуација и барала одмор за викенди.
Компанијата, чие име не беше споменато, тогаш одговори дека е подготвена да ја ослободи од работа за време на викендите, но дека нема да се обврзува на тоа во иднина доколку работата бара нејзино присуство.
Случајот потоа дојде до суд, а конечната одлука ја донесе Врховниот суд.
