Поранешниот пакистански премиер Имран Кан и неговата сопруга Бушра Биби вчера се осудени на 14 години затвор за поткуп и корупција. Тие се обвинети дека незаконски продавале подароци кои Кан ги добивал како државник и парите од продажбата ги задржале за себе. Еден ден пред оваа пресуда Кан беше осуден на 10 години затвор за друго кривично дело.
Кан, кој беше премиер до 2022 година, кога му беше изгласана недоверба во парламентот, веќе отслужува тригодишна затворска казна за корупција. Во вторникот судот го осуди на 10 години за оддавање државни тајни, а во средата доби уште 14 години затвор за поткуп и корупција.
Поранешниот премиер вели дека сите кривични постапки против него се политички мотивирани.
Последната пресуда беше донесена само една недела пред парламентарните избори на 8 февруари, на кои на Кан му беше забрането да се кандидира.
Се верува дека сите изречени казни нема да се соберат заедно, туку дека Кан ќе ги издржува истовремено. Тој е во затвор од август минатата година, кога беше уапсен.
Неговата сопруга Бушра Биби им се предаде на властите по изрекувањето на пресудата во средата.
Двојката се венчаше во 2018 година, неколку месеци пред Кан да биде избран за премиер. Тие се обвинети дека незаконски продавале подароци кои Кан ги добивал како државник и парите од продажбата ги задржале за себе.
Партијата на Кан соопшти дека пресудата значи дека поранешниот премиер нема да може да извршува јавна функција 10 години.
Кан, поранешен меѓународен играч на крикет, ја повика јавноста да се одмазди за секоја пресуда со гласање на изборите на 8 февруари, но повика и на мир.
