Поради силен дожд и невреме што ја зафатија Шпанија, во прекин е железничкиот сообраќај на „медитеранскиот коридор“ меѓу Мадрид, Валенсија, Аликанте и Барселона.
Централниот и југоисточниот дел на земјава вчера ги зафати невреме, па затворени се многу патишта, паднати дрвја, а во некои области поплавени се и куќи.
Жителите на Мадрид и околината добија предупредувачка порака на мобилните телефони да не излегуваат од домовите, но невремето таму помина без посериозни последици.
Пожарникарите во Мадрид имале 726 интервенции.
Поради огромната количина на вода и кал на шините, возовите од главниот град кон западната провинција Екстремадура и јужна Андалузија привремено запреа во неделата.
Возовите од Мадрид до Андалузија сѐ уште не сообраќаат поради последиците од невремето во градот Толедо.
Шпанската метеоролошка служба извести дека дождот треба да ослабне во текот на понеделник. Земјата е под невообичаено силен удар од дожд и ветар, само една недела по неподносливите горештини и пожари.
