Италијанските здравствени работници започнаа еднодневен штрајк поради најавеното намалување на пензиите во јавниот сектор. Како резултат на штрајкот изгубени се околу 1,5 милиони прегледи.
Здравствените работници во Италија денеска започнаа 24-часовен штрајк поради што ќе откажат 1,5 милиони прегледи, соопштија здравствените синдикати. За време на штрајкот ќе бидат обезбедени сите итни медицински услуги, но други, вклучувајќи лабораториски тестови, операции и рендген, се во прашање, јавуваат италијанските медиуми.
Според синдикатите, во штрајкот кој започна на полноќ учествуваат околу 50 отсто од вработените во здравството. Италијанските здравствени работници штрајкуваат за да го изразат своето противење на предлог-буџетот на Италија за следната година, за кој моментално расправа парламентот во Рим. Тие, исто така, бараат повеќе персонал, соодветно финансирање за продолжување на колективниот договор за лекарите и укинување на планираните намалувања на пензиите за вработените во јавниот сектор, во кои се вклучени лекарите и наставниците.
Владата и партиите работат на решавање на прашањето за планираното намалување на пензиите. Италијанскиот министер за односи со Парламентот Лука Цириани по средбата со партиските претставници изрази очекување дека оваа недела ќе биде постигнат договор за измени на пензискиот план.
Нов штрајк најавен за 18 декември
Демонстрации на медицинскиот персонал се најавени и за денеска низ Италија. Лидерите на синдикатот ќе се состанат на штрајк со седење во центарот на Рим. Во изминатите неколку дена веќе имаше штрајкови во железничкиот и локалниот транспорт во Италија против буџетските планови на владата на премиерот Џорџија Мелони.
Според италијанската новинска агенција Анса, нов здравствен штрајк е планиран за 18 декември под слоганот „Спасете го јавниот здравствен систем“, на кој повика синдикалното здружение на здравствени работници Intersindacale medica.
