Поради непочитување на законската процедура, Министерството за надворешни работи поништи десетина огласи за упатување дипломати во дипломатските претставништва на државата.
Огласите според Министерството за надворешни работи, се објавени на 3 јуни по завршување на парламентарните изборите и пред формирање на новата влада, а со цел местата да се пополнат со кадри на ДУИ.
Одлуката за поништување е донесена од страна на министерот за надворешни работи и надворешна трговија, Тимчо Муцунски.
Османи неколку дена пред крај на министерската функција распиша огласи за дипломати во Мисијата на Македонија во ОН во Њујорк, во амбасадите во Москва, Тел Авив, Токио, Рим, Киев, во генералниот конзулат во Њу Џерси.
За пониските дипломатски звања се бараа кандидати за амбасадите во Лондон, Берлин, Астана, Бразилија, Осло, Варшава и во генералните конзулати во Истанбул и Минхен.
На 24 јуни беше избрана новата македонска влада, а на 28 јуни е извршено примопредавање на функцијата министер за надворешни работи меѓу новоименуваниот министер Тимчо Муцунски и дотогашниот министер Бујар Османи.
