По нападот на две кучиња во близина на основно училиште во Бирмингем, шест лица поради повредите завршија во болница. Инцидентот се случил вчера околу 14:30 часот по локално време. Надлежните велат дека еден постар маж бил пренесен во болница со повреди кои не се опасни по живот, а уште пет лица завршиле во болница поради каснувања.
28-годишен маж е уапсен од полицијата на Вест Мидлендс под сомнение дека поседува агресивни и надвор од контрола кучиња. Двете кучиња се одземени од нивниот сопственик и однесени во прифатилиште за кучиња, пишува Index.hr.
Училиштето беше затворено еден час
„Бевме повикани во Willow Gardens кратко по 14.30 часот по извештаите за напади од кучиња. Постариот маж е пренесен во болница со повреди од каснување кои не се очекува да бидат опасни по живот. Уште пет лица се пренесени во болница со повреди од каснување за кои исто така се верува дека не се опасни по живот“, соопшти полицијата.
Би-би-си објави дека родителите на учениците од основното училиште Барфорд добиле СМС порака со предупредување за „потенцијално опасни кучиња во близина на училиштето“. Самото училиште наводно било затворено еден час додека кучињата не биле отстранети од улицата.
