Полициските службеници од Одделот за криминалистичка полиција, Секторот за недозволена трговија со дрога и оружје и СВР Струмица – ОВР Валандово запленија околу четири тони марихуана од правно лице во село Јосифово, Валандово.
Како што соопштија од МВР, заплената е резултат на истрага спроведена по контрола од Комисијата при Министерството за здравство, која открила сериозни неправилности во производството и складирањето на марихуаната.
Од МВР информираат дека при контролата на крајот на октомври и почетокот на ноември оваа година, извршена во присуство на полициски службеници, било утврдено дека дел од декларираната марихуана за медицински цели не соодветствува со стандардите.
„Во 500 кутии со етикета за сув цвет со ТХЦ, содржината се состоеше од отпадни материјали, гранки и био маса“, велат од полицијата. Анализата извршена на Фармацевтскиот факултет ја потврдила фалсификацијата, што според законот претставува кривично дело.
Полицијата повика 16 лица на службен разговор, меѓу кои сопственици, управители и работници на правното лице.
„Утврдено е дека недостасуваат околу 11 килограми марихуана од специфична сорта, како и дека био масата со ТХЦ која требаше да биде уништена е затекната на локацијата“, изјавија од МВР.
Во соопштението се наведува и дека откриени се неправилности во складирањето на марихуаната од реколта 2023 година.
„Околу 815 килограми марихуана беа несоодветно складирани во полиетиленски вреќи, без потребните сигурносни ознаки“, додаваат од полицијата.
Надлежното Обвинителство во Гевгелија издаде наредба за заплена на 1.390 килограми фалсификувана марихуана, 1.629 килограми био маса со ТХЦ и 815 килограми марихуана. Исто така, Комисијата при Министерството за здравство донесе одлука за одземање на лиценцата за производство на марихуана за медицински цели на ова правно лице.
Против управителот на правното лице, 21-годишниот У.Р.Г. од Бугарија, поранешниот управител Љ.С. (35) од Ново Село и уште тројца осомничени лица, поднесени се кривични пријави.
„Собрани се сите материјални докази и поднесени се пријави за сериозни прекршувања на Законот за контрола на опојни дроги“, се наведува во соопштението на МВР.
