Француската полиција изврши претрес во седиштето на партијата „Препород” на претседателот Емануел Макрон, како дел од истрагата за финансирањето на изборните кампањи во 2017 и 2022 година.
Истрагата за финансирање на кампањата премина во оперативна фаза, а француската жандармерија влезе во седиштето на партијата на Макрон, како и во просториите на консултантската фирма „Меккинси” во Осмиот париски арондисман, по што аферата го доби и името, јави парискиот весник „Паризиен”.
Информацијата ја потврдија и од државното обвинителство за финансии, пишува „Либерасион” и додава дека и претходно биле претресувани канцелариите на „Меккинси”, но ова е првпат жандармеријата да биде во просториите на партијата на Макрон.
Претресот е извршен врз основа на две истраги што ги води обвинителството, а француските медиуми јавуваат дека жандармеријата ги посетила и канцелариите на финансиери на кампањата.
Француските обвинители во октомври отворија истрага за финансирањето на претседателските кампањи на Макрон и финансиските неправилности поврзани со ангажирањето на консултантски фирми.
Францускиот министер за економија Бруно Лемер во ноември призна дека имало неправилности при ангажирањето на консултантската фирма „Меккинси”.
