Голем број полицајци денеска беа распоредени во неколку кинески градови за да го спречат заживувањето на протестите што ја зафатија земјата во последните денови поради политиката на нулта ковид и ограничувањата на слободата. На улиците на главниот град Пекинг и другите големи градови како Шангај, Гуангжу и Хангжу, полицискиот контингент од вчера е засилен.Безбедносните сили сè повеќе ги запираат случајните минувачи и ги проверуваат нивните телефони за сомнителна содржина или софтвер, вклучително и VPN што може да се користат за заобиколување на цензурата на интернет. Во Пекинг, полицијата беше особено фокусирана на обезбедувањето на шеталиштето на реката Лиангма во близина на дипломатскиот кварт, каде стотици протестираа во неделата навечер.
Во меѓувреме, во финансискиот центар на Шангај, беа подигнати бариери долж патот Вулумуки за да се спречи собирање на големи толпи, како што се случи во текот на викендот.
Неодамнешните протести, крајно невообичаени во земјата со повеќе од 1,4 милијарди луѓе управувана од комунизмот, беа поттикнати од гневот поради смртоносниот пожар во станбена зграда во главниот град на провинцијата Ксинџијанг, Урумчи, во кој загинаа десет луѓе минатата недела. Неколку жители објавија на социјалните мрежи дека ограничувањата на коронавирусот ги попречуваат напорите за спасување.
Карантин подолг од 100 дена
Градските власти ги отфрлија ваквите наводи. Големи делови од регионот Ксинџијанг и неговиот главен град се под карантин повеќе од сто дена.
Кина моментално бележи најголем број случаи на Ковид-19 од почетокот на пандемијата. Утринава, Здравствената комисија во Пекинг објави 38.400 нови случаи, што е малку помалку од рекордот од повеќе од 40.000 поставени претходниот ден.
Во моментов има големи ограничувања на движењето во неколку кинески градови со повеќе од милион жители, како што се Пекинг, тешко погодениот јужен кинески град Гуангжу и Чонгкинг.
