Северноатлантската алијанса го поздравува договорот меѓу српскиот претседател Александар Вучиќ и косовскиот премиер Албин Курти, постигнат вчера во Охрид и ги повика двете страни брзо и целосно да го спроведат договореното – изјави претставникот за печат на НАТО Оана Лунгеску.
– Ние сме посветени на стабилноста на Западен Балкан, вклучително и НАТО и КФОР – рече Лунгеску, пренесува Косово онлајн.
Високиот претставник за надворешна политика на Европската Унија Жозеп Борел го оцени како важен договорот на Курти и Вучиќ за спроведување на Договорот за нормализација на односите меѓу нив, поддржан од ЕУ. Борел рече дека Косово се согласило „веднаш да започне преговори со ЕУ“ за да обезбеди „соодветно ниво на самоменаџирање за српската заедница во Косово“.
– За имплементација на членот 7, Косово се согласи веднаш да започне преговори во дијалогот олеснет од ЕУ за создавање гаранции со цел да се обезбеди соодветно ниво на самоменаџирање за српската заедница во Косово – изјави Жозеф Борел, висок претставник на ЕУ.
Иако страните одлучија формално да не го потпишат договорот, како што рече, се договориле што поскоро да почнат да го спроведуваат.
– Она за што се согласија страните е Договорот и неговата имплементација преку Анексот да стане составен дел од нивните соодветни патишта кон Европската Унија. Јасно е дека двете страни ќе имаат голема корист од овој договор, бидејќи дијалогот не е само поради Косово и Србија, туку се работи за стабилноста, безбедноста и просперитетот на целиот регион – додаде Борел.
Претставникот на САД Габриел Ескобар изјави дека Косово и Србија постигнале „тежок, но неопходен“ договор. Тој рече дека постигнувањето на помирувањето им овозможува на Косово и Србија да се придвижат кон евроатлантската интеграција.
Амбасадорот на Соединетите Американски Држави во Србија, Кристофер Хил, денеска изјави дека Србија ја прифатила својата европска иднина и јасен план како да стигне до неа.
Како што напиша амбасадорот Хил на Твитер, таа одлука бара мудрост, интегритет и храброст. Хил рече дека има уште многу работа да се заврши и дека САД ќе бидат со Србија на секој чекор.
– Најважниот резултат од разговорите во Охрид: Србија ја прифати својата европска иднина и јасен план како да стигне таму – одлука која бара мудрост, интегритет и храброст. Има уште многу работа, а Соединетите Американски Држави ќе бидат со вас на секој чекор – напиша американскиот амбасадор во Србија.
Договорот од 11 члена, објавен на 27 февруари, не ја обврзува Србија да го признае Косово, но бара двете земји да ги прифаќаат меѓусебните документи и симболи, вклучувајќи: пасоши, дипломи и регистарски таблички.
Albanian
English
Macedonian
Turkish
