СВР Скопје денеска ќе преземе мерки за посебен режим на сообраќајот по неколку сообраќајници во центарот на Скопје поради одржување два синдикални првомајски протеста.
Како што соопшти МВР, од 10 до 12.30 часот ќе има посебен сообраќаен режим поради најавен протест на Конфедерација на слободни синдикати на Македонија со траса на движење од пред канцелариите на КСС на улицата 50 Дивизија, по улицата Јордан Мијалков, булеварот Климент Охридски сѐ до Владата на булеварот Илинден.
Со почеток во 12 часот е најавен протест организиран од Сојузот на синдикатите на Македонија (ССМ) со траса на движење од пред зградата на ССМ на улицата Мирче Ацев кон Собранието по улиците Филип Втори Македонски, 11 Октомври и Димитрија Чуповски, потоа кон седиштето на Стопанската комора на Македонија и ќе заврши на булеварот Илинден пред Владата.
– МВР апелира до сите граѓани учесници во сообраќајот да ги почитуваат наредбите кои ќе ги даваат полициските службеници – информира Министерството.
