Поранешниот италијански фудбалер Џанлука Вијали почина на 59-годишна возраст, како последица од рак на панкреасот, јавуваат британските медиуми.
Вијали ја започна својата кариера во Кремонезе, неговиот роден клуб, пред да се пресели во Серија А каде играше за Сампдорија и Јувентус. Играчката кариера ја заврши во лондонски Челзи пред да замине на тренерска функција, потсетува Гардијан.
Вијали постигна 16 гола на 59 настапи за Италија, а беше во тимот на Азура на Светските првенства во 1986 и 1990 година.
„Гардијан“ потсетува дека пред неколку недели беше објавено дека Вијали се повлекува од функцијата шеф на италијанската репрезентативна делегација, со цел да се фокусира на лекувањето на ракот на панкреасот.
Вијали се надеваше дека ќе продолжи да работи во националниот тим, каде што соработуваше со селекторот Роберт Мачнчини, негов соиграч од Сампдорија.
Во ноември 2018 година, тој објави дека бил подложен на радиотерапија и хемотерапија, откако претходната година му бил дијагностициран рак.
Во април 2020 година беше објавено дека ја победил болеста, но ракот се вратил во декември 2021 година.
