„Луфтханза“ најверојатно дополнително ќе го намали бројот на летови во Германија, изјави извршниот директор на германскиот гигант Карстен Спор во интервју за „Билд ам Зонтаг“, по најавата на ирскиот авиопревозник „Рајанер“ да ги затвори операциите на три германски аеродроми.
Луфтханза и Кондор на почетокот на септември се пожалија на високите даноци за воздушниот сообраќај, безбедноста и таксите за контрола на летање, тврдејќи дека ги ставаат во неповолна положба во споредба со нивните конкуренти.
Во последните четири години, трошоците за контрола на летање, безбедносни проверки и такси се удвоија и денес изнесуваат седум милијарди евра годишно, изјави извршниот директор на Кондор, Петер Гербер, на деловна средба на аеродромот во Франкфурт на почетокот на минатиот месец.
Меѓународните превозници се повеќе ги избегнуваат германските аеродроми, што доведува до губење на врските со светот, предупреди шефот на Кондор.
Шефот за човечки ресурси во Луфтханза, Мајкл Нигеман, ја критикуваше владината регулатива за скапото одржливо воздухопловно гориво (SAF). Системот ќе регистрира само заминувања од ЕУ, така што центрите надвор од Европа ќе имаат предност, објасни Нигеман.
Од 2025 година, авиокомпаниите кои летаат од ЕУ ќе мора да користат просечно два отсто одржливо гориво, а до средината на векот нивниот удел би требало да се зголеми за 70 отсто.
Минатата недела ирската нискобуџетна авиокомпанија Ryanair објави дека, поради високите даноци и такси, планира да ги прекине операциите на аеродромите во Дортмунд, Дрезден и Лајпциг следното лето.
Тие планираат да ги намалат летовите од Хамбург за 60 отсто, а оние во германската престолнина Берлин за една петтина.
„Во летото 2025 година Германија ќе загуби 1,8 милиони седишта во авионите на Рајанер поради високите и зголемени давачки“, нагласи компанијата минатиот четврток, што ќе значи 12 отсто помалку патници од минатата година.
Шефот на Луфтханза во интервју за Билд нагласи дека понудата на летови е намалена поради „екстремното зголемување на државните трошоци“.
„Се повеќе авиокомпании ги избегнуваат германските аеродроми или откажуваат важни линии“, предупреди Спор, истакнувајќи дека стравува од можна послаба врска меѓу Германија и светот во иднина и можното влијание на послабите врски врз инвестициите.
Шефот на Луфтханза ги критикуваше и новите германски регулативи за гориво, вклучително и нови квоти за уделот на е-горивото, кое, според него, сè уште не е достапно во доволни количини.
Здружението на авиокомпании БДЛ се залага приходите од зголемените давачки да се насочат кон промоција на алтернативни горива за воздухопловство, повикувајќи се на предизборното ветување на владејачката коалиција предводена од канцеларот Олаф Шолц.
