По лесната болест, Ердоган се појави во јавноста
Турскиот претседател Реџеп Таип Ердоган, кој е болен од вторникот вечерта, повторно се појави во јавноста во саботата во Истанбул, објавија телевизиските станици.
Доцна во вторникот, Ердоган мораше накратко да го прекине телевизиското интервју во живо, откако претрпе, како што подоцна рече, стомачни проблеми.
Ердоган (69) подоцна се врати да го заврши интервјуто, во кое рече дека интензивната изборна кампања му предизвикала некои „сериозни“ стомачни проблеми.
Поради цревниот вирус, Ердоган ги одложи предизборните говори во три провинции во централна Анадолија во средата, две недели пред претседателските избори на 14 мај.
По четиридневно отсуство, турскиот претседател се појави на аеронаутичкиот саем „Текнофест“ на стариот аеродром „Ататурк“ во Истанбул, каде турската воена индустрија изложи дронови и авиони.
Според официјалната програма, Ердоган подоцна ќе учествува на изборен митинг во Измир, на западниот брег.
Тој во недела ја продолжува изборната кампања во Анкара.
Парламентарните и претседателските избори на 14 мај се сметаат за најтешкиот тест за 20-годишното владеење на Ердоган.
Обединетиот опозициски блок се обидува да го собори од власт во услови на сериозна економска криза и растечко незадоволство поради милионите бегалци во земјата.
Заедничкиот опозициски претседателски кандидат Кемал Киличдароглу во средата му посака на Ердоган брзо закрепнување.
