Затворениот руски опозициски политичар Алексеј Навални е преместен во казнена колонија во арктичкиот регион на северот на Русија, изјави неговата портпаролка во понеделникот откако поддржувачите изгубија контакт со него повеќе од две недели, пишува Ројтерс.
Навални беше пронајден во казнената колонија ИК-3 во Харп во регионот Јамал-Ненец, околу 1.900 километри североисточно од Москва, рече портпаролката Кира Јармиш.
– Адвокатот на Навални успеа да го види во понеделникот – рече таа.
Сојузниците на Навални, кои се подготвуваа за неговиот очекуван трансфер во „специјален режим“, во затворска колонија која е најтешкиот можен затвор во Русија, велат дека тој не бил виден од неговите адвокати од 6 декември.
– Голема благодарност до нашите поддржувачи, активисти, новинари и медиуми кои се загрижени за судбината на Алексеј и кои не се изморуваат да пишуваат за ситуацијата – изјави адвокатот на Навални Иван Жданов.
Жданов рече дека неговите поддржувачи испратиле 618 барања за информации за локацијата на Навални, кој бил затворен во казнената колонија на 235 километри источно од Москва.
„Кој знае каде е Навални добива парична награда“
Претходно денеска, сојузниците на затворениот руски опозиционер и критичар на Кремљ Алексеј Навални понудија парична награда за информации за тоа каде се наоѓа, откако тој „исчезна“ од рускиот затворски систем пред речиси три недели.
Соработниците на 47-годишниот активист предупредија дека неговиот живот може да биде во опасност, велејќи дека Навални имал „сериозни здравствени проблеми“ непосредно пред да исчезне, пишува „Москва тајмс“.
