Полицијата во Србија пет дена трага по В.Н.(13), а од вчера во бегство му се придружил и помалиот брат З.Н.(11). Браќата одамна им направија многу неволји на институциите бидејќи досега безброј пати избегаа од Центарот за социјална работа, каде што се ставени под сомнение дека извршиле убиство и повеќе од 40 грабежи низ Нови Сад, пишува српски „Блиц“.
Браќата знаат дека поради старосната граница не одговараат кривично и дека не можат да бидат сместени во затворена институција. На нивната и е одземено старателското право додека за момчињата е констатирано дека имаат нарушувања во личниот развој.
Браќата беа сместени во Центарот за социјална работа, откако до смрт го претепаа Тодор Шуњка (75).
По второто бегство од Центарот за социјална работа со 16-годишна другарка, постариот В.Н е осомничен за најмалку девет посериозни кражби и четири тешки кражби во обид. Кога конечно бил приведен, за помалку од 24 часа успеал да побегне со помалиот брат и оттогаш му се губи секаква трага.
Помладиот брат З.Н. бил фатен на Божиќ и предаден во Центарот за социјална работа, од каде што избегал за неполни 24 часа.
Извор за „Блиц“ запознаен со случајот тврди дека на полицијата и Центарот за социјална работа им се „врзани рацете“.
– Изгледа дека В.Н прави повеќе проблеми од помалиот брат, бидејќи едвај успеваат да го задржат и да го вратат во Центарот за социјална работа, додека З.Н еднаш дури и доброволно се вратил. За жал, тоа не траело долго и тој повторно побегнал многу брзо. Тие не одговораат за криминалите и не смеат да бидат сместени во затворена институција, а вработените во Центарот за социјална работа немаат ниту време за воспитно да постапат по нив, бидејќи децата веднаш бегаат. Затоа сега бараме системско решение – вели нашиот соговорник.
Како што неофицијално дознава „Блиц“, проблематичните браќа треба да бидат разделени и преместени во друг Центар за социјална работа, надвор од Нови Сад.
– Центрите за социјална работа генерално имаат проблем со криминално неодговорните деца, а ова што се случува во Нови Сад навистина кулминираше, бидејќи такви случаи досега немало. Бегства од речиси сите такви институции во Србија имало откако постојат, но не се случило овие деца постојано да вршат криминални дејствија. Бажните браќа секогаш наоѓаат начин да избегаат. И кога вратата од сместувањето е затворена, и кога надворешната капија е затворена, тие бегаат низ прозорецот, ја прескокнуваат оградата и се враќаат на улица – раскажал извор запознаен со случајот со малолетните браќа.
Изворот за „Блиц“ вели дека сега проблемот го достигнал врвот:
– Колку што знам, Центарот за социјална работа повеќепати барал помош од надлежните, но не добиле. Побараа момчињата да бидат префрлени во друга институција, но проблемот е што никој не ги сака. Никој нема да ги посвои, никој нема да им биде згрижувач, ниту некој друг Центар за социјална работа. Сите Центри имаат автономија да го отфрлат предлогот за преместување на проблематичните деца кои не можат да се прилагодат од една општина или град во друга средина. Токму тоа е случајот овде. Ниту една институција од цела Србија не ги сакаше, а сега еден Центар за социјална работа конечно прифати да го прими помалиот брат.
