Претседателот Владимир Путин не стана среде ноќ за да ја следи претседателската дебата на САД меѓу Џо Бајден и Доналд Трамп, а Русија нема да коментира за внатрешната политика на САД, соопшти во петокот Кремљ, пренесува ГласотНаАмерика.
– Па, видете, не мислам дека очекувате претседателот на Русија да навие аларм, да се разбуди пред утро и да ги гледа дебатите во САД? – им рече Песков на новинарите на прашањето дали Путин следи и додаде:
– Имаме многу прашања кои се навистина важни за нашата земја, а кои се релевантни за нас. Тоа се прашањата со кои се занимава нашиот претседател. Дебатите во САД не се дел од главните прашања на агендата.
Русија се спомна во дебатата на Трамп и Бајден. И двајцата кандидати за претседател на САД се обидоа да покажат кој е построг во надворешната политика.
Трамп рече дека ако САД имаа „вистински претседател“ кој го почитува Путин, рускиот лидер никогаш нема да ја нападне Украина.
Бајден одговори:
– Пуштете го Путин да влезе и да ја контролира Украина, а потоа да продолжи во Полска и други места. Погледнете што ќе се случи тогаш. Тој (Трамп) нема поим за што по ѓаволите зборува.
