Ако ви е дијагностициран пред-дијабетес или дијабетес, или некој од вашето семејство страда од оваа состојба, треба да бидете внимателни. Управувањето со шеќерот во крвта е процес кој започнува со правење здрави избори, особено кога станува збор за храната што ја јадеме.
Но, тоа е само еден дел од сложувалката. Заедно со урамнотежена исхрана, управување со стресот и избегнување на пушење, истражувањата покажаа дека редовното вежбање, дури и кратко и со низок интензитет, може да има значително влијание врз намалувањето на шеќерот во крвта.Според извештајот објавен во списанието „Sports Medicine“, пешачењето од две до пет минути, веднаш по оброкот, може да го намали ризикот од дијабетес тип 2 бидејќи помага да се контролира нивото на шеќер во крвта.
Пешачењето му помага на нивото на шеќер во крвта да расте и опаѓа со постепено темпо
Овој извештај е направен со разгледување на седум различни студии за да се утврди како прекинувањето на продолженото седење, било со стоење или со кратка прошетка, може да влијае на нивото на шеќер во крвта и инсулинот кај една личност. На повеќето од учесниците во истражувањето не им бил дијагностициран преддијабетес или дијабетес.
Она што научниците го открија е дека пешачењето од две до пет минути по половина час седење помага нивото на шеќер во крвта да се зголемува и опаѓа со постепено темпо.
„Пешачењето или вежбањето може да помогне да се намали шеќерот во крвта после оброк“, вели диететичарката Ејми Гудсон, истакнувајќи дека кардио вежбите можат да имаат долготраен ефект.
Тоа не значи дека можеме да јадеме што сакаме
Откритието е ветувачко бидејќи многу луѓе мислат дека мора да вежбаат долго или интензивно за да го одржат нивото на шеќер во крвта ниско. Одвојувањето само неколку минути за прошетка по оброкот и повремените кратки паузи од седењето може да имаат значително влијание на шеќерот во крвта, а со тоа и на целокупното здравје, пренесува Index.hr.
Секако, тоа не значи дека можете да јадете што сакате. Заклучокот е дека најдобар начин за контрола е да јадете помали и почести оброци кои содржат јаглехидрати и протеини богати со влакна.
