Папата Франциск изјави дека го налутило и згрозило палењето на светата книга Куран и дека го осудува и отфрла дозволувањето на таквиот чин како форма на слобода на говор.
– Секоја книга што се смета за света треба да се почитува за да се почитуваат оние кои веруваат во неа – кажа папата во интервју за весникот од Обединетите Арапски Емирати „Ал Итихад“, што денеска е објавено.
– Јас сум лут и згрозен од тие постапки. Слободата на говорот никогаш не смее да се користи како алатка за презирање на другите, а дозволувањето на тaкво нешто треба да се отфрли и осуди – рече папата Франциск во интервјуто.
Минатата недела швеѓанец искина и запали Куран во шведскиот главен град Стокхолм, што наиде на остра осуда од неколку земји, вклучително и Турција, чија поддршка Шведска треба да добие за да се приклучи на воената алијанса на НАТО.
Иако шведската полиција одби неколку неодамнешни барања за протести против Куранот, судовите ги укинаа ваквите одлуки, наведувајќи дека тоа ја нарушува слободата на говорот.
Група од 57 исламски нации вчера соопштија дека се потребни колективни мерки за да се спречат актите на сквернавење на Куранот и дека меѓународното право треба да се користи за да се запре верската омраза.
