Палестинскиот претседател Махмуд Абас денеска изјави дека единственото политичко решение за деескалација на конфликтот во регионот на Појасот Газа е „крај на израелската окупација на Палестина“.
Тој во телефонски разговор со алжирскиот претседател Абделмаџид Тебун рече дека е неопходно да се работи со сите страни за да се запре агресијата на Израел.
– Воспоставувањето безбедност и мир во регионот бара прекин на окупацијата на државата Палестина, со Ерусалим како главен град – рече Абас.
Германскиот канцелар Олаф Шолц изјави дека во текот на денот треба да разговара со лидерите на Франција, САД и Велика Британија за кризата предизвикана од ненадејниот напад на Хамас врз Израел.
– САД, Велика Британија, Франција и Германија се обединети, истакна Шолц на заедничката прес-конференција со францускиот претседател Емануел Макрон во Хамбург.
Шолц потенцира дека „не смее да се дозволи ова да го запали регионот“.
И министрите за надворешни работи на земјите-членки на Арапската лига закажаа состанок за како што велат, „да се запре израелската агресија“ врз Појасот Газа. Состанокот е закажан за 11 октомври во Каиро. Вонредната седница ќе се одржи на барање на Палестинците.
Арапска лига со седиште во Каиро е регионална организација на арапските земји од Блискиот Исток и северна Африка. Организацијата е формирана во 1945 година и денес брои 22 членки. Главна цел е да се координира нивната соработка, да се обезбеди независноста и суверенитетот, и генерално да се координираат работите и интересите на арапските земји.
