Големото невреме проследено со обилни врнежи од град што попладнево го зафати Скопје, направи големи штети во Драчево и во околината на Кисела Вода.
Градоначалникот Орце Ѓорѓиевски и службите веднаш излегоа на терен, каде на лице место се интервенира со цел што побрзо да им се помогне на жителите.
Како што велат од општината, на располагање стојат и дежурни телефони каде граѓаните кои имаат проблем, можат да се јават и да пријават.
– Драчево и околината на Кисела Вода денес ги зафати силно невреме проследено со обилни врнежи од град кои направија огромна штета. Имавме доста повици за уништени автомобили и домови каде што веднаш интервениравме. За жал, не можеме да ги спречиме временските непогоди но можеме да бидеме рака под рака со граѓаните и заедно да го поминеме ова. Да ги санираме штетите и да делуваме таму каде што е најпотребно. Заедно со екипите сме на терен и остануваме таму сѐ додека секој дом не биде овозможен за живеење. Сите служби сме на располагање, вклучувајќи ме и мене и ве повикувам сите кои имате било каков проблем и потреба да се јавите на: 071391250 или 070259942. Ние заедно ќе го пребродиме и ова – изјави градоначалникот Ѓорѓиевски.
