Поранешен руски дипломат, кој поднесе оставка од својата функција во ОН минатата година во знак на протест поради војната, вели дека моќта на рускиот претседател Владимир Путин е значително нарушена поради неуспешниот бунт за време на викендот и дека Евгениј Пригожин треба да се плаши за својот живот и покрај договорот што му овозможил да избега во Белорусија, пренесува УСА Тудеј.
Борис Бондарев се најде во центарот на вниманието на светската јавност во мај 2022 година кога објави дека е против војната и пребегна. Во интервјуто во понеделникот за австралиската телевизија Еј-би-си, тој рече дека Путин веројатно ќе бара одмазда за краткиот марш на Пригожин до Москва.
– Тоа му наштетува на имиџот на Путин како одлучувачки лидер кој може да скрши секого. Значи, верувам дека Пригожин сега има многу причини да биде многу загрижен за својот живот, бидејќи мислам дека Путин не може така лесно да прости – рече Бондарев.
Бондарев рече дека внатрешниот круг на Путин се намалува и дека повеќето луѓе во Кремљ не ја поддржуваат војната.
Бондарев, кој сега живее во Швајцарија, вели дека не е изненаден што Пригожин успеал лесно да ги преземе воените пунктови на почетокот на неговиот марш. Руските воени лидери не се способни за независно размислување, зашто Путин тоа го гледа како закана за неговото железно владеење.
– Нема иницијатива, нема сопствена одлука. Значи, кога ќе се појави криза, никој не знае што да прави. Никој не сака да преземе одговорност – објаснува Бондарев.
