Основното јавно обвинителство Скопје издаде наредба за обдукција на телото на 79-годишна жена која почина откако повеќе од 10 дена беше хоспитализирана по семејно труење со домашна храна во Скопје. Претходно, по истиот настан почина 47-годишна жена, додека 55-годишниот маж е пуштен на домашно лекување.
„Надлежниот јавен обвинител работи на утврдување на причините за труењето. Од домот на семејството се подигнати 20-тина различи траги за кои е издадена наредба за вештачење. Исто така, издадена е наредба за обезбедување на медицинските истории на тројцата пациенти. Се преземаат и други дејствија“ – соопшти Јавното обвинителство.
На 15 октомври на Клиниката за токсикологија биле примени три лица од исто семејство во Кисела вода, со тешки симптоми на труење од домашна храна, приготвена во нивниот дом, односно пита со праз. Според првичните сознанија, во питата имало високи концентрации инсектицид „метомил“, наречен и „ланате“, чија продажба е забранета со закон.
