Повеќе од илјада авганистански цивили се убиени во бомбашки напади и други насилства откако странските сили ја напуштија земјата и Талибанците ја презедоа власта во 2021 година, се вели во извештајот на мисијата на ОН во Авганистан објавен во вторникот.
Помеѓу 15 август 2021 година и мај оваа година, според Мисијата на ОН во Авганистан (УНАМА), биле убиени 1.095 цивили, а 2.679 биле ранети, што ги нагласува безбедносните предизвици дури и по завршувањето на една деценија војна.
Повеќето од смртните случаи, нешто повеќе од 700, биле предизвикани од импровизирани експлозивни направи, вклучително и самоубиствени напади на јавни места како што се џамии, образовни центри и пазари.
Иако вооружените борби драстично се намалија откако талибанците ја презедоа власта во август 2021 година, кога армијата поддржана од НАТО се распушти, безбедносните предизвици остануваат, особено оние што ги наметнува т.н. Исламска држава.
Таа милитантна група е одговорна за повеќето напади, според УНАМА, која исто така забележа дека смртоносноста на нападите ескалирала и покрај помалку насилни инциденти.
„Податоците на УНАМА ја нагласуваат не само континуираната цивилна штета што произлегува од таквите напади, туку и зголемувањето на смртноста на самоубиствените напади од 15 август 2021 година, при што помалку напади предизвикуваат повеќе цивилни жртви“, се вели во извештајот.
Талибанците тврдат дека се фокусирани на обезбедување на земјата и извршиле неколку напади врз ќелиите на т.н. Исламска држава во последните месеци.
Нешто повеќе од 1.700 жртви, вклучувајќи ги и повредените, беа припишани на експлозивни напади за кои т.н. Исламска држава, според УНАМА.
Министерството за надворешни работи, управувано од Талибанците, во одговор до ОН рече дека Авганистан се соочил со безбедносни предизвици за време на повеќедецениската војна пред нејзината влада, позната како Исламски емират, да ја преземе власта и ситуацијата да се подобри.
„Безбедносните сили на Исламскиот емират се посветени на обезбедување на безбедноста на граѓаните и преземање навремени мерки за искоренување на безбедносните засолништа на терористите“, се вели во соопштението.
