По цел месец „нечкање”, најпосле го дочекавме продолжението на институционалната сапунска опера наречена „Контрола на Охрид Трчат”. Даночните инспектори од УЈП-Битола одеднаш станаа најзафатени луѓе во државата – немаа време за контрола на сомнително здружение, како што немаме време да ја платиме струјата на време.
А изговорот е класичен бирократски бисер: „премногу сме зафатени”. Но, зафатени со што точно? Можеби со контрола на малиот локален фризер или пекарата што понекогаш заборава да издаде фискална сметка за кифла од 20 денари?
Сега кога најпосле собраа храброст да почнат контрола, експертите нѐ потсетуваат дека законот налага да се контролира и сестринското здружение на Охрид Трчат – „Фестивал на водени спортови Охрид”. Зачудувачки, и во двете организации се појавува иста сопственичка структура! Каква случајност, нели?
Но тоа не е сѐ – даночните инспектори ќе мора да завлечат нос и кај „партнерите” и „донаторите” како „Костал”, „Телеком”, „Би Милк” и другите компании што великодушно ги полнеле касичките на овие „непрофитни” организации. Интересно ќе биде да видиме колку „донации” завршиле во форма на „спонзорства” и каква вредност имала услугата што наводно им била испорачана.
И додека даночните инспектори ги собираат фактурите, МВР останува клучен дел од оваа приказна. Според поранешните началници на СВР Охрид, полицијата не само што обезбедувала настани, туку и „заборавала” да испостави фактура за ангажманот. Над 50 полицајци со службени возила и техника работеле како приватно обезбедување за настан од кој некој добро профитирал.
Се чини дека во нашата држава, одредени организации имаат привилегии што другите можат само да ги сонуваат. Сите други мора да платат за полициско обезбедување, но не и „Охрид Трчат”. Додека обичен граѓанин мора да плати за секоја алка во синџирот на државата, други добиваат бесплатно полициско обезбедување од МВР, одложени даночни контроли и институционално замижување.
Останува прашањето: кога МВР и другите институции конечно ќе почнат да „трчаат” по трагата на можниот криминал, наместо да „трчаат” во круг околу проблемот.
Сашо Денесовски
