Охрабрени од изборите за членови на Советот на општина Тетово, челниците на ВМРО-ДПМНЕ бараат предвремени парламентарни избори.
„Промените победија во Тетово! Голема победа на ВМРО-ДПМНЕ! Промените ќе победат во Македонија! Предвремени избори за излез на Македонија од националната и економска криза!“, напиша на Фејсбук потпретседателот на ВМРО-ДПМНЕ Александар Николоски.
Се огласи и Антонио Милошоски, со оценка на исходот во Тетово:
„Резултатите во една голема општина како Тетово покажаа дека актуелната државна власт е двојно делeгитимирана. Ова е аргумент плус за предвремени парламентарни избори, како прв чекор за излез од кризата, со влада која ќе има и легитимитет и капацитет да нуди решенија за сериозните проблеми со кои се соочува секој човек во Македонија“.
Претходно Владимир Ѓорчев оцени дека Владата на СДСМ е „жестоко делегитимирана од огромен број на граѓани“.
– Односот на гласови помеѓу ВМРО-ДПМНЕ и СДСМ во Тетово е 2 спрема 1, во советници е 4 спрема 2, а ако тоа го пресликаме на ниво на Македонија, односот и во гласови и на анкетите е 400.000 гласови за ВМРО-ДПМНЕ, 200.000 гласови за СДСМ. Тоа значи дека ВМРО-ДПМНЕ во моментот би имала 55 пратеници, СДСМ 27 со целата нивна коалиција – пресмета Ѓорчев, член на Извршниот комитет на ВМРО-ДПМНЕ.
Поразителен е фактот, вели Ѓорчев, дека власта на СДСМ и на Ковачевски треба по три пати да повторува избори како што се случи во Центар Жупа и во Маврово Ростуше, за да има доволно гласови, затоа што за време на Зоран Заев и Ковачевски народот масовно се иселува:
– Исто така треба да се каже дека за жал Ковачевски може да победува само исклучиво кога е единствен кандидат. Единствен кандидат беше Зоран Зев за претседател на СДСМ и доби 99 проценти гласови, единствен кандидат на предлог на Зоран Заев за претседател на СДСМ беше Ковачевски и доби 99 проценти од гласовите и вчера прогласува победа која што не е негова. Победата во Центар Жупа е на Демократската партија на Турците, а Ковачевски има само споредна улога – оцени Ѓорчев.
