Вториот најголем пожар во историјата на Њу Мексико би можел да се засили овој викенд бидејќи ветерот и сушата во американската сојузна држава го отежнуваат ограничувањето на ширењето на пожарот.
Таканаречениот Hermits Peak Fire гори повеќе од еден месец и пожарот зафатил површина поголема од градот Чикаго. Многу семејства останаа без покрив над главата, а илјадници се евакуирани, пишува Би-Би-Си.
Се очекува ветерот и речиси рекордните високи температури и ниската влажност дополнително да го поттикнат ширењето на пожарот. Националната метеоролошка служба во Албакерки предупреди дека за време на викендот се очекуваат ветровити и суви услови кои „ќе ја влошат нашата лоша ситуација“.
Американскиот претседател Џо Бајден прогласи голема катастрофа во Ново Мексико оваа недела и даде можност за користење на федералните ресурси, вклучително и финансиска помош за жителите на тие области.
Рестораните и продавниците во Лас Вегас, град со 13.000 жители, се затворени, а истата судбина ја делат и училиштата, освен ако не се префрлиле на работа само од далечина. „Буквално е како да живеете под темен облак. Тоа е вознемирувачко“, изјави Лиз Бирмингем, жителка на градот.
„Постои неизвесност и страв како ветровите ќе влијаат на пожарот од ден на ден. Кога луѓето се евакуирани од област, тие не можат да се вратат, па затоа се само загрижени“, изјави Елмо Бака, претседател на фондацијата на заедницата во Лас Вегас.
Се верува дека пожарот започнал на 6 април и делумно е поврзан со превентивен пожар што го лансираше Шумската служба на САД за да ја намали запаливата вегетација. Но, пожарот потоа се споил со друг шумски пожар.
Инциденцата на големи шумски пожари драстично се зголеми во последните децении. Во споредба со 1970-тите, пожарите поголеми од 40 квадратни милји сега се седум пати почести во западниот дел на САД, според независната организација на научници и новинари Climate Central.
