Оперативно-техничка агенција (OTA) ja уверува јавноста дека не го набавила, не го користела и не го користи софтверот „Предатор“. Агенцијата смета дека е малициозна намерата да се направи било каква поврзаност на ОТА со настаните во Грција, а особено кога тоа е веќе јавно демантирано.
„За жал и покрај јавните објави и деманти од страна на ОТА, продолжува трендот на манипулирање на јавноста со свесно креирање и објавување на невистинити содржини од политички центри на моќ и нивно пласирање во дел од медиумите. Во оваа прилика уште еднаш повторуваме и со сигурност уверуваме дека од страна на ОТА не е набавен, не се користел ниту се користи споменатиот софтвер „Предатор“ и малициозна е намерата да се направи било каква поврзаност на ОТА со настаните во Р Грција, а особено кога истото е веќе јавно демантирано“, се наведува во реакцијата од Агенцијата.
Оттаму потсетуваат дека по спроведувањето на реформите во делот на следењето на комуникациите и формирањето на ОТА како самостоен и независен државен орган, основна мисија и цел на Агенцијата е придонесување кон враќање на изгубената доверба на јавноста кон еден особено чувствителен институционален сегмент.
„Во таа насока ОТА посветено работи на воспоставување на законски, безбеден, ефикасен и контролабилен систем за следење на комуникациите. Со воспоставените механизми на заштита од страна на ОТА, следењето на комуникации без издадена судска наредба во Република Северна Македонија е минато и масовно следење не е и нема да биде возможно. Во насока на заштита на јавниот интерес, апелираме на одговорно постапување од страна на сите чинители, како и на промптно институционално постапување за што веќе е известено Јавното обвинителство“, се додава во реакцијата од Оперативно-техничката агенција.
