Под влијание на уште постуден воздушен бран од север и од североисток, од утре (недела), па и на почетокот на следната седмица, температурите ќе паднат за 4 до 8 степени во однос на сегашните, а облачноста ќе се зголемува и ќе има појава на повремен локален дожд, додека, пак, на планините повремено ќе врне снег, со што е можна појава и на првата снежна покривка за оваа сезона таму, иако истата ќе биде тенка.
Повремено ќе дува слаб до умерен ветар од источен и од југоисточен правец.
И во Скопскиот регион следува значително постудено време во следниот период, а облачноста ќе се зголеми и ќе има услови за повремен локален дожд со слаб до умерен интензитет. Ќе дува слаб до умерен ветар претежно од југоисточен правец.
Наутро, особено утре (недела), како и во понеделник, температурите повторно ќе бидат особено ниски и на повеќе места низ Македонија ќе се спуштаат под нулата, додека, пак, особено во Беровскиот регион, температурата се очекува да се спушти до околу -7 или -8 степени.
Што се однесува до максималните дневни температури, утре (недела), како и на почетокот на следната седмица, температурите ќе се искачуваат во интервалот од 7 до 14 степени. Во Скопје наутро температурата ќе се спушта во интервалот помеѓу -2 и 1 степен, додека, пак, максималната дневна температура ќе се искачува до околу 14 степени.
Albanian
English
Macedonian
Turkish
