Прилепското основно јавно обвинителство интензивно работи на предистрагата за случајот со новороденчето кое на 27 октомври се роди здраво во прилепската градска болница, а по три дена, поради проблеми со дишењето, беше префрлено на Клиниката за детски болести во Скопје, каде по една недела почина од сепса – информира основниот јавен обвинител Стевчо Биноски.
Предметот е отворен по пријавата на родителите, кои дале изјави и ја доставиле својата документација, а обвинителството ја побарало и документацијата за овој случај од болницата во Прилеп и од детската клиника во Скопје.
– Дали и кого ќе повикаме да даде исказ ќе зависи од она што е содржано во документацијата – изјави Биноски.
Директорката на прилепската градска болница Кети Смилеска информира дека го исчекуваат барањето и секако ќе ја достават документацијата.
Во меѓувреме болничката Комисија за интрахоспитални инфекции побара вонреден надзор од двете одделенија – гинеколошкото и неонатолошкото и земени се брисеви.
– Од Центарот за јавно здравје од Прилеп се земени брисеви од сите предмети во одделенијата, како и од персоналот и се чекаат резултатите, како и по надзорот на Државниот здравствен и санитарен инспекторат. Документацијата е на располагање на обвинителството – изјави Смилеска.
